पद्मिनी एकादशी पुरुषोत्तम मास (अधिक मास) को शुक्ल पक्षमा पर्ने अत्यन्त पवित्र र दुर्लभ एकादशी हो। यो एकादशी प्रत्येक तीन वर्षमा एक पटक मात्र पर्ने भएकाले यसको धार्मिक महत्त्व विशेष मानिन्छ। भगवान विष्णु तथा माता लक्ष्मीलाई समर्पित यस व्रतको पालन गर्दा पाप नाश हुने, सुख–समृद्धि प्राप्त हुने तथा मोक्ष प्राप्त हुने धार्मिक विश्वास रहेको छ।

सनातन धर्ममा पुरुषोत्तम मासलाई भगवान विष्णुको प्रिय महिना मानिन्छ। यस महिनामा गरिने पूजा, व्रत, जप तथा दानलाई अत्यन्त फलदायी मानिने भएकाले पद्मिनी एकादशीलाई पनि विशेष श्रद्धाका साथ मनाइन्छ।

पद्मिनी एकादशी कसरी मनाइन्छ?
पद्मिनी एकादशीको दिन भक्तजन बिहान सबेरै उठेर स्नान गरी सफा वस्त्र धारण गर्छन्। त्यसपछि भगवान विष्णु र माता लक्ष्मीको पूजा गरिन्छ। तुलसीपत्र, फूल, धूप, दीप तथा फलफूल अर्पण गरी पूजा गर्ने परम्परा छ।

यस दिन उपवास बस्ने चलन छ। धेरै भक्तजन फलाहार मात्र ग्रहण गर्छन् भने केहीले निर्जल व्रत पनि बस्ने गर्छन्। अन्न तथा तामसिक भोजन सेवन नगर्ने धार्मिक मान्यता रहेको छ।

भक्तजन विष्णु सहस्रनाम पाठ गर्ने, भजन–कीर्तन गर्ने तथा भगवान विष्णुको कथा श्रवण गर्ने गर्छन्। रातभर जाग्राम बस्नु पनि शुभ मानिन्छ। द्वादशीको दिन पूजा, दान तथा ब्राह्मण भोजन गराई व्रत पारण गर्ने परम्परा रहेको छ। धार्मिक विश्वासअनुसार यस दिन गरिने दान–पुण्यले विशेष फल प्राप्त हुन्छ।